გაეროს ადამიანის უფლებათა უმაღლესი კომისარი ცენტრალურ აფრიკაში სამშვიდობო მისიით მყოფი გარკვეული ჯარისკაცის მხრიდან ადგილობრივ არასრულწლოვან გოგონებზე განხორციელებული სექსუალური ძალადობის შესახებ საუბრობს, რომელშიც ქართველი სამხედროებიც მონაწილეობდნენ.
თავდაცვის სამინისტროს გენშტაბის უფროსის პირველი მოადგილის ომარ ბეგოიძის ინფორმაციით, თავდაცვის სამინისტრომ ცენტრალური აფრიკის რესპუბლიკის სამშვიდობო მისიაში მყოფი ჯარისკაცების შესახებ გავრცელებული ინფორმაციის საფუძველზე დაწყებული გამოძიების ფარგლებში, შესაძლოა, დაზარალებულებთან შეხვედრა მოითხოვოს. განცხადებას ბეგოძე "კვირის პალიტრასთან" საუბრისას აკეთებს:
"ერთი კვირის წინ, როდესაც წინასწარი შეტყობინება მივიღეთ, მოვითხოვეთ გამოძიების მასალების გაცნობა, თუმცა აქამდე პასუხი არ მიგვიღია... იმას, რაც გაეროს კომისრის განცხადებაშია ნათქვამი, ფაქტებს ვერ დავარქმევ, რადგან მტკიცებულებები და ეჭვმიტანილები არ არსებობს.
დეტალების გარეშე ვერაფერს დავასკვნით და დავიწყეთ გამოძიება... გაეროს და ევროკავშირს ვთხოვეთ, გამოძიების პროცესში დაგვეხმარონ. ალბათ, მოვითხოვთ დაზარალებულებთან შეხვედრასაც.
ახლა მიმდინარეობს ჩვენი ჯარისკაცების დაკითხვა. თუ დამნაშავე რეალურად არსებობს, გამოვლინდება კიდეც და მკაცრად დაისჯება, თუ არა, გაეროს ექნება ზუსტი დასკვნა, რომ ჩვენი ჯარისკაცები უდანაშაულონი არიან...
პირველად დადასტურდა, რომ ცილი დასწამეს ქართველებს. სრულფასოვანი გამოძიების ჩატარება იმიტომაც გვინდა, რომ ერთხელ და სამუდამოდ წერტილი დაესვას ცილისწამებასა და პროვოკაციას", - აღნიშნავს ომარ ბეგოიძე.
წყარო: კვირის პალიტრა
