„გაერთიანებული დემოკრატიული მოძრაობის" წევრი დიმიტრი ლორთქიფანიძე რელიგიური გრძნობების შეურაცხყოფისთვის სანქციების გამკაცრებას მხარს უჭერს და აცხადებს, რომ ამ მიმართულებით რეგულაციების გატარება აუცილებელია. ამის შესახებ ლორთქიფანიძე „რეპორტიორს" ესაუბრა და აქვე დასძინა, რომ უმცირესობების უფლებების რეალიზაცია უმრავლესობის უფლებების შელახვის ხარჯზე არ უნდა ხდებოდეს.
„ვფიქრობ, რომ გამოხატვის თავისუფლება არ არის აბსოლუტური უფლება და ის აუცილებლად უნდა იზღუდებოდეს, როდესაც გამოხატვის უფლების რელიზაციით შეიძლება სხვათა უფლებები შეილახოს. მხარს ვუჭერ ზვიად ტომარაძის ინიციატივას, რომელიც საპარლამენტო კომიტეტებზე ისმინება.
რაც შეეხება სანქციებს, ვფიქრობ, ეს არის უშუალოდ იურიდიული ტექნიკის თემა, რომელიც საბოლოო ჯამში უნდა დაემყაროს გარკვეულ გამოცდილებას. ზოგადად, სანქცია რომ გასატარებელია, ეს ცხადია. იქნება ეს ფინანსური სანქცია თუ სხვა ტიპის ადმინისტრაციული დარღვევისთვის გათვალისწინებული, ეს პარლამენტარების გადასაწყვეტია. მთავარია, რომ რეგულაციამ აუცილებლად უნდა მოაწესრიგოს ურთიერთობა საზოგადოების შიგნით დაპირისპირებულ ჯგუფებს შორის.
ეს ის შემთხვევაა, როდესაც უმცირესობების უფლებების რეალიზაცია უმცირესობის დიქტატურად არ უნდა იქცეს. დემოკრატია არ არის უმცირესობების დიქტატურა", - განაცხადა ლორთქიფანიძემ.
