„ხიდაშელმა და ძმებმა ბერძენიშვილებმა გააგრძელეს არჩევნების გაყალბების სააკაშვილისეული გზა და ისინი ამას არც 2016 წლის არჩევნებში მოიშლიან!" - ამის შესახებ „პატრიოტთა ალიანსის" ლიდერი ირმა ინაშვილი საუბრობს და „ასავალ-დასავალთან" ინტერვიუში საგარეჯოს რაიონში ჩატარებულ შუალედურ არჩევნებს იხსენებს. ინაშვილის თქმით, თავდაცვის მინისტრმა საგარეჯოში არჩევნების მოსაგებად 500-მდე სამხედრო მოსამსახურე გამოიყენა.

„დღევანდელი ხელისუფლების მთავარი პრობლემა გახლავთ რესპუბლიკური პარტია და ქალბატონი თინა ხიდაშელი, რომელიც არჩევნების გამყალბებლად ჩამოყალიბდა. სწორედ ამიტომ ვუწოდე ხიდაშელს „თინა გამყალბებლოვა"! ვიცოდი, ვინ იყო სინამდვილეში თინა ხიდაშელი და ამიტომაც საგარეჯოს არჩევნების წინ, 12 ოქტომბერს, უწყებათაშორის კომისიაზე იუსტიციის მინისტრისა და სხვა მაღალჩინოსნების თვალწინ საჯაროდ მოვითხოვე, თავდაცვის სამინისტროს დაესახელებინა, რამდენი სამხედრო იყო რეგისტრირებული საგარეჯოში, კერძოდ, მუხროვანში. მაშინ მითხრეს, რომ საგარეჯოს არცევნებში 27 სამხედრო მიიღებდა მონაწილეობას. სამი დღის შემდეგ ხიდაშელმა ხუთასზე მეტი სამხედრო გადაისროლა საგარეჯოში და იმის შემდეგ გვიმტკიცებს, იქ ყოველთვის ასეულობით ჯარისკაცი იმყოფებოდაო! ხიდაშელმა და ძმებმა ბერძენიშვილებმა გააგრძელეს არჩევნების გაყალბების სააკაშვილისეული გზა და ისინი ამას არც 2016 წლის არჩევნებში მოიშლიან!" - განაცხადა ინაშვილმა.

(მოამზადა ნენე სტეფანიშვილმა)

წყარო:   „ასავალ-დასავალი"