„ბუტას სასამართლო პროცესს აღარ ვესწრები. მოსამართლეები ამბობენ, მურუსიძეები ვართ ყველაო. თუ მურუსიძეები არიან ყველანი, მაშინ რა აზრი აქვს სხდომებზე ჩემს დასწრებას",- აცხადებს „რეპორტიორთან" საუბრისას ბუტა რობაქიძის მამა სოსო რობაქიძე. მისი თქმით, ის, რომ ლევან მურუსიძე, ევა გოცირიძე და სხვები დღეს მოსამართლეები არიან, „ქართული ოცნების" „დამსახურებაა". რობაქიძე არ გამორიცხავს, საზოგადოებაში ამან საპროტესტო ტალღა ააგოროს.
„როგორც მე ვიცი, კოპალიანს, ბუტას მოსამართლეს, ახლაც უნდა მოსამართლეობა. ის აფრასიძეების საქმეზეც მოსამართლე იყო, და ორივე შემთხვევაში არასწორი გადაწყვეტილება მიიღო. ახლაც სურს, დაამტკიცონ 10 წლით მოსამართლედ. თუ ასეთი ხალხი უნდათ მოსამართლეებად და დასვამენ, მაშინ იმ ტოტს მოჭრიან, რაზეც სხედან. საქართველოში ძალიან მალე დიდი საპროტესტო ტალღა აგორდება. დამნაშავე მოსამართლეებს სააკაშვილ-ადეიშვილის მიერ მოწყობილ გენოციდში აქვთ მონაწილეობა მიღებული და თუ ასეთ სასამართლოს ტოვებენ, მაშინ გამოვა, რომ თავი და თავი სააკაშვილი არ ყოფილა ამ უბედურების. თავი და თავი ის ხალხი ყოფილა, ვინც მაშინ სააკაშვილს ეხმარებოდა", - განაცხადა რობაქიძემ.
რაც შეეხება მანანა კობახიძის მოწოდებას მოსამართლეებისადმი, აღიარონ „ნაციონალური მოძრაობის" დროინდელი ზეწოლის ფაქტები პროკურატურის მხრიდან და ეპატიებათ, რობაქიძის თქმით, ეს პოლიტიკოსების გადასაწყვეტი არაა.
„თუ მოსამართლეებმა აღიარეს ზეწოლის ფაქტები, მაშინ არც მანანა კობახიძეს და არც არავის არ ეკითხება, აპატიოს ეს მოსამართლეებს თუ არა. ჩემი აზრით, ისინი კანონის შესაბამისად უნდა დაისაჯონ. ზოგადად მიმაჩნია, რომ არ მგონია, რაც ხდებოდა იმ პერიოდში, საპატიებელი იყოს", - განაცხადა რობაქიძემ.
