ივანიშვილის მიერ „ქართული ოცნების" არაფორმალური მართვის შესახებ კიდევ ერთხელ გაკეთდა განცხადება. გუშინ პარლამენტში გოკა გაბაშვილმა განაცხადა, რომ ქვეყანას ბიძინა ივანიშვილი არაფორმალურად მართავს. ამ განცხადებას „რეპორტიორთან" საუბრისას გამოეხმაურა იურიდიულ საკითხთა საპარლამენტო კომიტეტის თავმჯდომარე ვახტანგ ხმალაძე და განმარტა, რომ ეს არასწორი მოსაზრებაა:
„როგორ შეიძლება, ასე ითქვას?! თუ ვინმე ვინმეს მიმართავს რჩევისთვის, ეს არავისთვისაა გასაკვირი, ასეთი რამ ყოველთვის ხდება. ის, რომ ივანიშვილი არაფორმალური მმართველია და განსაზღვრავს ყველაფერს, მიმაჩნია, რომ არასწორი მოსაზრებაა და ასეთ პოზიციას ვერანაირად ვერ გავიზიარებ. ყველა ადამიანი მიმართავს ვიღაცას რჩევისთვის, მაგრამ მე პირადად არასდროს მიმიმართავს ბიძინა ივანიშვილისთვის. ისე, როგორც მე განვსაზღვრავ, ვისი რეკომენდაცია და რჩევა მჭირდება, ასევე თვითონ უნდა განსაზღვროს „ქართული ოცნების" თითოეულმა წევრმა, ამის სრული უფლება აქვთ", - ამბობს ხმალაძე.
