6 თებერვალს მიხეილ თუმანიშვილის 95 წლის იუბილე კინომსახიობთა თეატრში აღინიშნა. იუბილეს აღსანიშნავად თუმანიშვილის თეატრის სცენაზე სპექტაკლი „ჩვენი პატარა ქალაქი" დაიდგა. ყოველი წლის 6 თებერვალს „ჩვენი პატარა ქალაქიდან" მსახიობთა დასი დიდ რეჟოსორს დაბადების დღეს ულოცავს.
„ასეთ გენიალურ ადამიანთან როცა მუშაობ, ყოველი დღე არის განსაკუთრებული და სიურპრიზებით სავსე. ის ხომ არაორდინარული პიროვნება იყო. ამ სპექტაკლში უზარმაზარი ენერგეტიკაა და ისეა აწყობილი, რომ ამდენი ხანია ვთამაშობ და ისევ ცოცხალია", - აცხადებს მსახიობი რუსუდან ბოლქვაძე.
„ზოგჯერ ჯაჯღანაც იყო, ზოგჯერ - ინტრიგანიც, სულ რაღაცას თამაშობდა, ქსოვდა, ისტორიებს იგონებდა და მერე ჰყვებოდა", - იხსენებს მსახიობი ზურა ყიფშიძე.
„ხან იყო მკაცრი, ხან - ძალიან დამთმობი და მომთმენი. პრემიერის დროს გადმორთული იყო მსახიობებზე, რადგან თვლიდა, რომ თავისი საქმე უკვე გააკეთა რეჟისორმა", - ამბობს მსახიობი ნინელი ჭანკვეტაძე.
