„მაესტროს" ერთ-ერთმა დამფუძნებელმა ბაჩო კიკაბიძემ ირაკლი რუხაძის განცხადების კომენტირებისას, რომლის მიხედვით, კოტე გოგელია რუხაძეს სთავაზობდა ბაჩო კიკაბიძის წილის შესყიდვას, ჟურნალისტებს განუცხადა, რომ „მაესტროს" დაფუძნებასა და დაარსებაში ძალიან დიდი წვლილი აქვს შეტანილი, თუმცა წილი ტელეკომპანიაში ნამდვილად არ აქვს.

„ძალიან დიდი წვლილი მაქვს „მაესტროს" დაფუძნებასა და დაარსებაში, თუმცა ვინ ვის შესთავაზა 9 მილიონი, ვინ - ვის 5 და ვინ - ვის 7,5, ამ საკითხებში ვერ ჩავერევი. წილები ტელეკომპანიაში ნამდვილად არ მაქვს. ვერ დაგიდასტურებთ რუხაძის განცხადებებს.
რუხაძემ მას, როგორც ძმაკაცს ასესხა რამდენიმე მილიონი, კარგი საძმაკაცო ჰყავს გია გაჩეჩილაძეს, პრემიერიც მისი ძმაკაცია, თან რამდენიმე მილიონის სესხება მიდის. ამის გამო მშურს მე მისი", - განაცხადა ბაჩო კიკაბიძემ.

მოამზადა ნათია ცუხიშვილმა