ვეტერანების საქმეთა სახელმწიფო სამსახურის დაფინანსებით, გერმანული საპროთეზო ცენტრი „OttoBock"  და შეზღუდული შესაძლებლობების მქონე პირთა სოციალურ-სარეაბილიტაციო ცენტრი  ქართველ ამპუტანტ  40 ვეტერანს მაღალტექნოლოგიურ  პროთეზებს დაუმზადებენ.  სარეაბილიტაციო ცენტრში ვეტერანების საქმეთა სახელმწიფო სამსახურის დირექტორი ირაკლი შიხიაშვილი  და  „OttoBock"-ის წარმომადგენლები ვეტერანების საჭიროებებს ადგილზე გაეცნენ.

„ჩვენ ვაგრძელებთ მუშაობას „OttoBock"-თან ერთად. მოგეხსენებათ, რომ წინა წელს ჩვენ 38 პროთეზი 33 მეომარს დავუმზადეთ. დიდი მადლობა სარეაბილიტაციო ცენტრს, ვისთან ერთადაც ეს პროექტი ხორციელდება. ამ წლისთვის ჩვენ ვგეგმავთ, დაახლოებით, 150 ვეტერანისთვის ახალი პროთეზების დამზადებას. მინდა ვუთხრა თითოეულ ვეტერანს, რომ  ეს პროცესი გაგრძელდება მანამ, სანამ ყველა ვეტერანს არ ექნება თანამედროვე ტიპის ახალი პროთეზები", - განაცხადა ირაკლი შიხიაშვილმა.

2015 წელს ვეტერანების საქმეთა სახელმწიფო სამსახურს, შეზღუდული შესაძლებლობების მქონე პირთა სოციალურ სარეაბილიტაციო ცენტრსა და მსოფლიოში ლიდერ საპროთეზო ცენტრ „OttoBock"-ს შორის სამმხრივი  მემორანდუმი  გაფორმდა. მემორანდუმის თანახმად, პირველ ეტაპზე, გასულ წელს 33 ამპუტანტ ვეტერანს 38  პროთეზი უკვე დაუმზადდა.  2016 წელს  კი  „OttoBock"-ის მიერ წარმოებული მაღალტექნოლოგიური პროთეზებით 150 ამპუტანტი ვეტერანის უზრუნველყოფა იგეგმება.