საქართველოს მთავრობის ინიციატივას - „საგადასახადო კოდექსში ცვლილება" ბიზნესმენი გიორგი ყურულაშვილი დადებითად აფასებს. როგორც ბიზნესმენმა განაცხადა, კოდექსში ამ ცვლილებით ბიუჯეტში შემავალი თანხა შემცირდება, მაგრამ გაიზრდება კომპანიების რაოდენობა, ბიზნესმენები უფრო მეტ კაპიტალს დააბანდებენ თავიანთ ბიზნესში.
„პროექტი „საგადასახადო კოდექსში ცვლილება" ბიზნესზე დადებითად იმოქმედებს. ნებისმიერი ბიზნესმენი, ვინც მოგებაზე არის ორიენტირებული, რაც ნაკლებს გადაიხდის, მით უკეთესი. სახელმწიფოს მხრიდან რომ შევხედოთ, შემცირდება ბიუჯეტში შემავალი თანხა, მაგრამ გაიზრდება თვითონ კომპანიების რაოდენობა. ბიზნესმენები უფრო მეტ კაპიტალს დააბანდებენ თავიანთ ბიზნესში. მე, როგორც ბიზნესმენი, იმ 18 პროცენტს, რასაც ვიხდიდი, ვეცდები, რომ ჩემთვის არ მოვიტოვო და ისევ ჩემს ბიზნესს მოვახმარო. რეინვესტირება საკმაოდ საინტერესოა, მიუხედავად იმისა, რომ თანხები ბიუჯეტში იმდენი აღარ შევა, ეკონომიკაში დარჩება, რაც ძალიან მნიშვნელოვანია", - განაცხადა გიორგი ყურულაშვილმა.
