საქართველოს პრემიერ-მინისტრმა გიორგი კვირიკაშვილმა „როიტერთან" ინტერვიუში განაცხადა, რომ NATO-სა და ევროკავშირთან დაკავშირებით საქართველოს გეგმები რუსეთის მიერ კონფრონტაციის ნიშნად არ უნდა იქნეს მიჩნეული.
პრემიერის თქმით, საქართველო გააგრძელებს NATO-ში გაწევრიანებისთვის მუშაობას და რუსეთის მიმართ პრაგმატული პოლიტიკის განხორციელებას.
გიორგი კვირიკაშვილმა ასევე მოუწოდა ევროკავშირს, რომ საქართველოსთვის უვიზო მიმოსვლის შესახებ გადაწყვეტილების მიღების პროცესი არ გადადონ.
„ვიმედოვნებ, რომ ათ წელიწადში შესაძლებელი გახდება, ვნახო საქართველოს ეკონომიკა, შემოსავლები და ერთ სულ მოსახლეზე მთლიანი შიდა პროდუქტი აღმოსავლეთ ევროპის სტანდარტებთან შესადარი", - განაცხადა პრემიერმა.
„როიტერთან" ინტერვიუში მან ასევე ირანთან კავშირებზეც ისაუბრა.
„დასავლეთის სანქციების მოხსნის შემდეგ ირანს რეგიონში ახალი დინამიკის შემოტანა შეუძლია. ხოლო საქართველოს მდებარეობა ევროპისა და აზიის გასაყარზე, ირანსა და ევროპას შორის თანამშრომლობის გაღრმავებას შეუწყობს ხელს. ირანი მზადაა სხვადასხვა სფეროში თანამშრომლობისთვის, მათ შორის ენერგოსექტორში, რაც ევროპისთვის ძალიან საინტერესო შესაძლოა იყოს საკუთარი ენერგორესურსების დივერსიფიკაციისთვის", - განაცხადა კვირიკაშვილმა.
პრემიერის თქმით, საქართველოს მთავრობა აპირებს, საერთაშორისო ინსტიტუტებს ინფრასტრუქტურული პროექტების განხორციელებისთვის დამატებითი დაფინანსების თხოვნით მიმართოს.
მოამზადა ნათია ცუხიშვილმა
