საქართველოს ფინანსთა მინისტრმა, ნოდარ ხადურმა გადაცემა 2030-ში საგადასახდო რეფორმის შესახებაც ისაუბრა.

„ბიზნესი მოგების გადასახადს იმ შემთხვევაში გადაიხდის, თუ მოგებულ თანხას ამოიღებს და უხეშად რომ ვთქვათ, ჯიბეში ჩაიდებს. თანხა, რომელიც ეკონომიკაში დარჩება, არ დაიბეგრება. ეს შიდა დანაზოგებს გაზრდის, რითაც ბიზნესს განვითარების დამატებითი სტიმული მიეცემა. ძირითადი საშუალებების იმპორტიორები დღგ-ს საზღვარზე აღარ გადაიხდიან. მოხდება საგადასახადოს შემოწმების რეგლამენტირება, მივიღეთ მკაცრი გადაწყვეტილება, რომ ყველა საწარმოს შემოწმების უფლება მხოლოდ შემოსავლების სამსახურს ჰქონდეს... ეს ყველაფერი, ბიზნესის განვითარებისთვის საჭირო გარემოს შექმნის",-აღნიშნა ხადურმა.

ფინანსთა მინისტრის თქმით, ბიუჯეტი დეფიციტურია, სამინისტრო კი რეფორმას ატარებს.

„ექსპერტობის ამბიციის მქონე ადამიანებმა უნდა იცოდნენ, რომ საგადასახადო და ხარჯვის კალენდარი ერთმანეთს არ ემთხვევა. შემოსავალი თანაბარი არ არის და ვერც იქნება. მაგალითად, ბიუჯეტში მარტში ყოველთვის მეტი შემოსავალი შემოვა, ვიდრე იანვარში. ეს ორჯერ ორია. ამისათვის ფულს არ ვბეჭდავთ და არც ეროვნული ბანკისგან ვსესხულობთ. ხარჯებსა და შემოსავლებს შორის სხვაობა დღეს 100 მილიონია, მაგრამ ეს ჩვეულებრივი მოვლენაა. სრული პასუხისმგებლობით ვაცხადებ, რომ ეს ლარს არ აუფასურებს. ბიუჯეტის გადახედვის საჭიროება იმიტომ დადგა, რომ ჩვენ რადიკალურ საგადასახადო რეფორმას ვატარებთ. ვცვლით ერთ-ერთ ძირითად გადასახადს, რომლის წილიც ბიუჯეტში, წელიწადში, მილიარდი ლარია",-აღნიშნა ნოდარ ხადურმა.