ქალაქ რუსთავში,  13:00 საათზე, ლეონიძის სახელობის სკვერში აქციის „გაამწვანე საქართველო" ფარგლებში 1000 ძირი შავი ფიჭვის ნერგი დაირგვება.

ღონისძიებაზე ესწრებიან საქართველოს პარლამენტის ვიცე სპიკერი, რუსთავის მაჟორიტარი დეპუტატი ზვიად ძიძიგური; გარემოსა და ბუნებრივი რესურსების დაცვის მინისტრი ხათუნა გოგალაძე; საქართველოს რეგიონული განვითარების და ინფრასტრუქტურის მინისტრი დავით ნარმანია; რუსთავის მერი დავით ჯიქია; რუსთაველი მიტროპოლიტი მეუფე იოანე და პატრიარქის ქორეპისკოპოსი მეუფე იაკობი. ასევე, საერთაშორისო ფონდის „გაამწვანე საქართველო" გამგეობის თავმჯდომარე, ეროვნული სატყეო საგენტოს უფროსი ბიძინა გიორგობიანი.

ნერგები რუსთავის თვითმმართველობას ფონდმა „გაამწვანე საქართველო" გადასცა. საერთაშორისო ფონდის „გაამწვანე საქართველო" შექმნის ინიციატორი და თავმჯდომარე, ილია II ფონდის პირველი შემწირველია 50 ათასი აშშ დოლარით. ფონდი „გაამწვანე საქართველო" ქვეყანაში ეკოლოგიური პრობლემების აღმოფხვრას და ტყე-პარკების შექმნას ისახავს მიზნად.

აქციის დასრულების შემდეგ, რუსთავის დრამატულ თეატრში, სპეციალურად ამ დღისადმი მიძღვნილი კონცერტი გაიმართება.