საქართველოს რეგიონული განვითარებისა და ინფრასტრუქტურის მინისტრის, დავით ნარმანიას ინფორმაციით, ეკონომიკის ექსპერტები  ინფრასტრუქტურული პროექტების ტემპით დაინტერესდნენ.

როგორც ეკონომიური გუნდის ექსპერტებისა და პრემიერ-მინისტრ ბიძინა ივანიშვილის შეხვედრის დასრულების შემდეგ დავით ნარმანიამ  განაცხადა, საუბარი  ინფრასტრუქტურულ პროექტებს, გამოცხადებულ ტენდერებსა და დაკონტრაქტებულ პროექტებს შეეხო.

მინისტრის თქმით, ექსპერტების მხრიდან დაისვა კითხვა, თუ რატომ არის ინფრასტრუქტურული პროექტების ტემპი წინა წელთან შედარებით დაბალი.

„გასულ წელს, საქართველოს პროკურატურა, ეკონომიკის სამინისტრო და სხვა უწყებები,  დიდ პროექტებს აშენებდნენ, რომელიც თავისებურად,   მთლიან შიდა პროდუქტზე და ეკონომიკურ ზრდაზე ახდენდა გავლენას. თუმცა, მათ სარგებლიანობასთან დაკავშირებით, კითხვის ნიშნები არსებობს. ეს ეხება საქართველოს პარლამენტის, მთავრობის სახლის მშენებლობას ქუთაისში და სხვა ისეთ პროექტებს, რომელსაც წინა ხელისუფლება  ერთი ადამიანის მოსაზრებებიდან გამომდინარე  აკეთებდა. რა თქმა უნდა, ამაში ფული იხარჯებოდა, ზოგიერთ შემთხვევაში გაურკვეველი წარმომავლობის რესურსებიც კი, რაც ეკონომიკაზე თავისებურ გავლენას ახდენდა,"- განაცხადა დავით ნარმანიამ.

მინისტრმა აღნიშნა, რომ წელს სოციალური დანიშნულების პროექტები დაფინანსდა. მისივე თქმით, 2013 წლის 6 თვის განმავლობაში, 2012 წლის ანალოგიურ პერიოდთან შედარებით, 10%-ით მეტი სამუშაო შესრულდა.