ნატოს გენერალური მდივანი უკრაინაში მიმდინარე მოვლენებს გამოხმაურა და ყველა მხარეს მოუწოდა თავი შეიკავონ ძალადობისგან. ანდერს ფოგ რასმუსენის განცხადებით, ხალხის უფლებაა, ყველგან გამოხატონ თავიანთი აზრი დემოკრატიული პროცესების მეშვეობით.
„მოვუწოდებ ყველა მხარეს, თავი შეიკავონ ძალადობისგან და ძალის გამოყენებისგან. დემოკრატიულ საზოგადოებაში ძალადობა და ძალის გამოყენება პოლიტიკური უთანხმოებების გადაწყვეტის გზა არ არის. ყველას მოვუწოდებ, გააგრძელონ მოქმედება კონსტიტუციური და დემოკრატიული ნორმების შესაბამისად. ნატო პატივს სცემს ყველა უკრაინელს და უკრაინული ერის დემოკრატიულ იდეალებს. მოვუწოდებ უკრაინას, როგორც ეუთო-ს თავმჯდომარე ქვეყანას, სრულად შეასრულოს მის მიერ ნაკისრი საერთაშორისო ვალდებულებები აზრის გამოხატვისა და შეკრების თავისუფლების თაობაზე", - აღნიშნულია ნატო-ს გენერალური მდივნის განცხადებაში.
