შინაგან საქმეთა მინისტრმა ალექსანდრე ჭიკაიძემ ოკუპირებული ცხინვალის რეგიონის ე.წ. ადმინისტრაციული საზღვრის მიმდებარე ტერიტორიები და ის სოფლები მოინახულა, სადაც ბოლო პერიოდში რუსი მესაზღვრეების მხრიდან მავთულხლართების ფიქსაციის პროცესმა სისტემატური ხასიათი მიიღო.
შს სამინისტროს ინფორმაციით, მინისტრი დიდი ხურვალეთის, დიცის, დვანის, ერგნეთის და კარალეთის მოსახლეობას შეხვდა, არსებულ პრობლემებს ადგილზე გაეცნო და მათგან მავთულხლართების ფიქსაციით გამოწვეული სირთულეების შესახებ დეტალური ინფორმაცია მიიღო.
როგორც ჭიკაიძემ მოსახლეობასთან საუბრისას აღნიშნა, ყველა არსებულ პრობლემაზე სამინისტროს შესაბამისი სამსახურები მუშაობენ. მინისტრის თქმით, სამინისტროს თანამშრომლები ოკუპაციის ხაზის მიმდებარე ტერიტორიებზე 24 საათის განმავლობაში პატრულირებენ.
„მინისტრის მითითებით, მოსახლეობის უსაფრთხოებისთვის რეგიონში გაძლიერდა შსს-ს ქვედანაყოფების პატრულირების ინტენსივობა. მავთულხლართების ფიქსაციის საკითხი და ოკუპაციის ხაზის მიმდებარე სოფლებში არსებული სხვა პრობლემები როგორც ინციდენტების პრევენციისა და მათზე რეაგირების მექანიზმის ჯგუფის ყოველთვიურ შეხვედრებზე სოფელ ერგნეთში, ასევე, ჟენევის მოლაპარაკებების ფორმატში აქტიურად განიხილება", - აცხადებენ შს სამინისტროში.
ჭიკაიძემ კარალეთში შსს-ს სპეციალური და საგანგებო ღონისძიებების ცენტრის ბაზა მოინახულა და ასევე, სამინისტროს იმ ქვედანაყოფის თანამშრომლებს შეხვდა, რომლებიც ოკუპაციის ხაზის მიმდებარედ ასრულებენ თავის მოვალეობას.
