ტრიო „სიმი" 25 წლის საიუბილეო კონცერტისთვის ემზადება. ქალაქური სიმღერის საღამო თბილისის დიდ საკონცერტო დარბაზში 20 დეკემებრს გაიმართება.

ტრიო მაყურებლის წინაშე ორკესტრის თანხლებით წარსდგება და 2-საათიან პროგრამას შესთავაზებს.  საიუბილეო კონცერტზე მომღერლები 16 ქალაქურ სიმღერას შეასრულებენ. კონცერტის დასასრულს კი ფილარმონიის წინ მათი ვარსკვლავი გაიხსნება.

ღონისძიება საქართველოს კულტურის პალატის ორგანიზებით იმართება. 

ტრიო „სიმი" 1988 წლის დეკემბერში შეიქმნა. ანსამბლის წევრები არიან ტექნიკური უნივერსიტეტის კურსდამთავრებული ინჟინრები: ზაზა ვეფხვაძე, რევაზ გელაშვილი და ზურაბ ცქიტიშვილი.

პირველი სიმღერა, რომელიც ახალგაზრდა მეგობრებმა იმღერეს, ირაკლი აბაშიძის ლექსის მიხედვით „წუხელ თოვდა" ოთარ რამიშვილმა დაწერა. შემდეგ ტრიოს მიერ შესრულებული „ქუთაისო ჩემო", „თუთა", „ღვინის აღმართი", „კესანები" და სხვა ქალაქური სიმღერები არა მხოლოდ საქართველოში, არამედ, მის საზღვრებს გარეთაც შეიყვარეს.

1991 წელს, ტრიომ პირველი აუდიო კასეტა, სახელწოდებით „რეტრო" ჩაწერა, რომელშიც კინოფილმებიდან ქართველი კომპოზიტორების ნაწარმოები შედის. „სიმმა" 25 წლის განმავლობაში მსოფლიოს მრავალ ქვეყანაში გამართა კონცერტები.