თბილისის საქალაქო სასამართლომ სრულად დააკმაყოფილა გიორგი ბარათაშვილის სარჩელი და იგი საზოგადოებრივი მაუწყებლის გენერალური დირექტორის თანამდებობაზე აღადგინა.
საქალაქო სასამართლოს ადმინისტრაციულ საქმეთა კოლეგიის მოსამართლის, ხატია არდაზიშვილის გადაწყვეტილება სასამართლოში დღეს გამოცხადდა.
სარეზოლუციო ნაწილის გამოცხადების შემდეგ, მხარეებს 14-დღიან ვადაში ჩაბარდებათ სასამართლოს დასაბუთებული გადაწყვეტილება, რის შემდეგაც გადაწყვეტილება კანონიერ ძალაში შევა.
შესაბამისად, გიორგი ბარათაშვილს საზოგადოებრივი მაუწყებლის გენერალური დირექტორის თანამდებობაზე მუშაობის გაგრძელების შესაძლებლობა, დასაბუთებული გადაწყვეტილების ჩაბარების შემდეგ მიეცემა.
რაც შეეხება სარჩელს, გიორგი ბარათაშვილმა სასამართლოს მიმართა - გაეუქმებინა 2013 წლის 6 სექტემბრის გადაწყვეტილება, რომლის მიხედვით, ბორდმა ბარათაშვილს უნდობლობა გამოუცხადა და თანამდებობიდან გადააყენა.
სარჩელში გიორგი ბარათაშვილი ასევე ითხოვდა 6 სექტემბრის შემდგომი პერიოდის სახელფასო ანაზღაურებას.
მისი ყველა სასარჩელო მოთხოვნა სასამართლომ დააკმაყოფილა.
