გაზეთი „კვირის პალიტრა" საზოგადოებრივი მაუწყებლის ყოფილი ხელმძღვანელის გია ჭანტურიას ინტერვიუს აქვეყნებს. ჟურნალისტ ლადო გოგოლაძის შეკითხვაზე - „ნაცმოძრაობის" მმართველობის დროს რატომ არასოდეს კეთდებოდა აქცენტები შეცდომებზე, ჭანტურიამ უპასუხა, რომ არ კეთდებოდა, თუმცა, „ესენი რა, აღიარებენ თავის შეცდომებს?".

„რუსეთის ბაზრის გახსნამ რომ არ გაამართლა, ამას ვინმე აღიარებს? მაინტერესებს, რატომ არაა დაპატიმრებული ჩოკუტაევი, თუ კეზერაშვილს უცებ პოულობს ინტერპოლი, „ოდნოკლასნიკის" ფოტოიან ჩოკუტაევს რატომ ვერ ეძებს? ამ ყველაფერს აღიარებს ვინმე, რომ მათი ბრალია? როცა გამოდიხარ და იძახი - ეკონომიკაში იმიტომ არის პრობლემები, რომ წინა 9 წელი „ნაციონალური მოძრაობა" იყო ხელისუფლებაშიო, რატომ ავიწყდება, რომ 9 წლის მანძილზე ყოველ მომდევნო წელი იყო წინაზე უკეთესი. ეს მსოფლიო ბანკის მონაცემია და არა ფინანსთა სამინისტროსი. ყბადაღებულ თემად იქცა 9 წელიწადი, ვიღაც ფეხს მოიტეხს - 9 წელიწადი, ვიღაცას მანქანა დაეჯახება - 9 წელიწადი. სამართლიანობა უნდა შეეხოს ყველას და არა შერჩევით პროვნებებს",- აცხადებს ჭანტურია.

(მოამზადა ლილუ მიროტაძემ)