რუსთავის N17 დაწესებულებაში მოშიმშილე პატიმრის, ირაკლი შულაიას ჯანმრთელობის მდგომარეობა დამძიმდა. მისი ადვოკატის, მამუკა ქირიას ინფორმაციით, პატიმარი ძალიან სუსტადაა და მას წვეთოვანი დაუდგეს. "მისი ფსიქიკური და ქცევითი მდგომარეობიდან გამომდინარე, თუ სასამართლო მიიღებდა კანონიერ გადაწყვეტილებას, სასჯელის მოსახდელად 11 თვე რჩებოდა. მას ეხება ე.წ. უდო, პირობით ვადაზე ადრე გათავისუფლება და ამ მოთხოვნით შიმშილობს. იმედია კომისია გადაწყვეტილებას დროულად მიიღებს, "- განაცხადა მამუკა ქირიამ. ირაკლი შულაია N17 დაწესებულებაში, სხვა პატიმრებთან ერთად, რომლებიც საქმეების გადახედვას ითხოვენ, უკვე მერვე დღეა შიმშილობს. ის წყლის მიღებაზეც უარს ამბობს. შულაიას ჯანმრთელობის უკიდურესად მძიმე მდგომარეობის შესახებ განცხადება დღეს ერთ-ერთი მსჯავრდებულის მოძღვარმა გააკეთა, რომელმაც მოშიმშილე პატიმრები მოინახულა. სასულიერო პირის თქმით, შულაია მასთან საუბრისას ითიშებოდა და გონებას კარგავდა. ბოლო ინფორმაციით, რუსთავის N17-ე დაწესებულებაში 48 პატიმარი შიმშილობს. პატიმრების ახლობლების თქმით, შიმშილობის შეწყვეტას დაწესებულებაში დეპუტატ ეკა ბესელიას მისვლამდე არ აპირებენ.