პროკურორის მხრიდან ზეწოლაზე, მამუკა ივანიაძის გარდა, სოფლის მეურნეობის მაღალჩინოსანთა საქმეზე დაკავებული კიდევ ერთი პირი საუბრობს. პროფესორ ზაზა მახარობლიძის განცხადებით, რომელიც „კვირის პალიტრასთან“ საუბრობს, მათი დაკითხვა კანონდარღვევით მიმდინარეობდა. ე.წ. მოდულში მათი მიყვანისთანავე სამართალდამცველების მხრიდან ზეწოლა დაიწყო. დაკითხვები მიმდინარეობდა ღამის საათებში. პროკურორი შ. რიჟამაძე ოთხი გამომძიებლის თანხლებით მახარობლიძეს ჩვენების მიცემას აიძულებდა. მათი მოთხოვნის დაკმაყოფილების შემთხვევაში კი გათავისუფლებას პირდებოდნენ. „ეს ხდებოდა მოდულში, საგამოძიებო ნაწილის უფროსის, ჯამასპიშვილის კაბინეტში. იგი მე და პროფესორ ქარჩავას გვეუბნებოდა, პროფესორების დაკავება არ გვჭირდებაო, მხოლოდ ჩვენება უნდა მიგვეცა მათთვის სასურველ პირებზე და თუ არ დავთანხმდებოდით, ციხეში გაგვიშვებდნენ. საინტერესოა, ვის ინტერესებში შედიოდა ამ ბინძური შანტაჟით მეცნიერების ციხეში გამომწყვდევა, მაშინ როდესაც სხვა საქმეებზე ანალოგიურ დანაშაულში ბრალდებულები გირაოს სანაცვლოდ გაათავისუფლეს.“ – აცხადებს ზაზა მახარობლიძე. მისი განმარტებით, მეცნიერებისთვის წარდგენილი ბრალდება უსაფუძვლო, პროფესიული თვასაზრისით კი ტენდენციურია. „მეცნიერებს ბრალი დაგვდეს, რომ სოფლის მეურნეობის პროგრამისთვის საკმარისი იყო თურქული წარმოების „ნიუ ჰოლანდ TD5 110“ მარკის 110 ცხ.ძ-იანი ტრაქტორი, ჩვენ კი რეკომენდაცია მივეცით 117 ცხ.ძ-იან ჩეხურ „ზეტორ პროქსიმა 120“-ს. „ჯითი ჯგუფი“ სამინისტროს ნაკლები სიმძლავრის თურქულ ტრაქტორს სთავაზობდა, რომელსაც რეკომენდაციას ვერ მივცემდით“. – აცხადებს ბრალდებული.