სახელმწიფო კანცელარიასთან სავაჭრო სახლ ,,საბას“ თანამშრომლების აქცია გაიმართა. 26 თებერვალს  სავაჭრო სახლში  გაჩენილი ხანძრის შედეგად დაზარალებულებმა კანცელარიის წინ ავეჯი მიიტანეს. მათ  თან აქვთ  პლაკატები და სურათები,  რომლებზეც   ხანძრის შემდეგ სავაჭრო სახლის განადგურებული შენობაა ასახული.  

 აქციის მონაწილეები  სახელმწიფოს გულგრილობაში ადანაშაულებენ და ფინანსთა მინისტრისაგან მოითხოვენ, რომ  ბანკებთან უშუამდგომლოს. ზარალის ანაზღაურება კი,  სარეზერვო ფონდიდან მოხდეს. ამასთან, ისინი  პრემიერ-მინისტრთან შეხვედრას ითხოვენ.

 დაზარალებულთა ინფორმაციით, 5 თვეა სხვადასხვა უწყებებს  ამაოდ მიმართავენ. ფინანსთა მინისტრს შეხვდნენ და ბანკებთან შუამდგომლობა სთხოვეს, რაზეც ნოდარ ხადურმა  აუდიტის დასკვნა მოითხოვა.  დასკვნის  წარდგენის შემდეგ კი უარი განაცხადა, იმ მოტივით, რომ მას არ ენდობა.

  ცოტა ხნის წინ აქციის მონაწილეებს პოლიციამ ტერიტორიის დატოვება და ავეჯის უკან წაღება  მოსთხოვა, რადგან კანონით მათ არა აქვთ კანცელარიის წინ ავეჯის დადგმის უფლება.

  აქციაზე მისულმა არასამთავრობო ორგანიზაციის „საზოგადოებრივი ინიციატივა“ – წარმომადგენელმა ლაშა ფარულავამ, პოლიციას  სთხოვა განემარტა, თუ რატომ უნდა დაეტოვებინათ ტერიტორია აქციის მონაწილეებს  და   მერიისაგან გაცემული აქციის ჩატარების ნებართვა წარუდგინა. ფარულავას განმარტებით,  აქციის მონაწილეები, შენობას პიკეტირებას არ უკეთებენ და კანცელარიის შენობიდან 20 მეტრში იმყოფებიან, რაც კანონით არის დაშვებული.