სოჭის ზამთრის 22-ე ოლიმპიური თამაშების გახსნის ცერემონიალზე ქართველი მოციგურავე, ელენე გედევანიშვილი ეროვნული დროშით წარსდგება. სათადარიგო მედროშედ იასონ აბრამაშვილი განიხილება.
ელენე გედევანიშვილის გარდა, გუნდში კიდევ სამი მოთხილამურე ირიცხება. თვის ბოლომდე ქართული ნაკრების შემადგენლობა შესაძლოა, კიდევ ერთი მოთხილამურით გაიზარდოს.
"ჩემთვის დიდი პატივია, რომ მე დროშის წამღებად ამირჩიეს. წინა ორ ოლიმპიადაზე ისე მოხდა, რომ გახსნაზე ვერ ჩავედი, რადგან ჩვენი შეჯიბრება ცოტა გვიანა არის, ვარჯიშების საშუალება არ გვეძლევა. დღეში მხოლოდ ნახევარ საათს გვაძლევენ და ეს საკმარისი არ არის, რომ ჩემი ფორმა შევინარჩუნო. დროშის წაღების გარდა კიდევ უფრო მნიშვნელოვანია, ჩემი ქვეყანა და დროშა ღირსეულად წარმოავდგინო", - განაცხადა გედევანიშვილმა.
ოლიმპიური თამაშები 7 თებერვლიდან 23 თებერვლის ჩათვლით გაიმართება. სოჭში, ქართული დელეგაცია 6 თებერვალს გაემგზავრება.
