კიევის მაცხოვრებლები დედაქალაქის ერთ-ერთ სავაჭრო ცენტრში, ფაქტობრივად, შიშვლები მივიდნენ. ისინი პრომო-კამპანიის დაპირებას აჰყვნენ, რომლის თანახმად, მომხმარებლებს, რომლებიც სუპერმარკეტის გახსნაზე ტრუსებსა და საცურაო კოსტუმებში მივიდოდნენ, უფასო ტანსაცმელი და ფეხსაცმელი შეხვდებოდათ.
როგორც „Комсомольская правда" წერს, ამ დაპირების გამო აქციის დაწყებამდე სავაჭრო ცენტრის წინ სხვადასხვა ასაკის დაახლოებით 100 კაცი და ქალი შეიკრიბა. ქარისა და წვიმის მიუხედავად, ტრუსებსა და საცურაო კოსტუმებში გამოწყობილი კიეველები შეპირებულ სიგნალს ელოდნენ, რომლის შემდეგ მათ მაღაზიებში უფასო ტანსაცმლისა და ფეხსაცმლისთვის შეუშვებდნენ. აღსანიშნავია, რომ აქციის წესებით, კლიენტებს შეჯიბრში უნდა მიეღოთ მონაწილეობა - მაღაზიებში ეარათ, სპეციალური სტიკერები აღმოეჩინათ და ბრენდის ტანსაცმლის, ფეხსაცმლისა და აქსესუარების სერთიფიკატები მიეღოთ.
„როდის მომხდარა ქვედა საცვლებით მაღაზიებში გევლოს და მილიციაში არ მოხვედრილიყავი!", - გაუზიარა აქციის შთაბეჭდილებები იულიამ სოციალური ქსელში მეგობრებს.
მიუხედავად ამისა, მონაწილეები აღშფოთებულნი იყვნენ და სოციალურ ქსელებში უკმაყოფილება გამოხატეს. კიეველები წუწუნებდნენ, რომ ტანსაცმელი ყველას არ შეხვდა, ხოლო კონკურსმა მათ სირცხვილის გარდა არაფერი მოუტანა.
(მოამზადა ლილუ მიროტაძემ)
