რეჟისორმა ზაზა ურუშაძემ ესტონეთის კინოკრიტიკოსთა პრიზი „მანდარინებისთვის" აიღო, რომელიც ესტონეთში წლის ფილმი გახდა. მთავარი როლის შემსრულებელს ლემბიტ ულფსაკს კი ერგო ჯილდო საუკეთესო როლისთვის.
ზაზა ურუშაძემ კიდევ ერთი პრიზი და მადლობა ესტონეთის საგარეო საქმეთა მინისტრისგან ესტონური კულტურის პოპულარიზაციისთვის მიიღო.
„მანდარინები" 2013 წელს საქართველოს ეროვნული კინოცენტრის და სახელმწიფოს დაფინანსებით გადაიღეს. ფილმის სიუჟეტი აფხაზეთის ომის ფონზე ვითარდება, თუმცა მასში ომის სცენები არ არის ასახული. ფილმი მოგვითხრობს აფხაზეთში მცხოვრებ ესტონელზე, რომელიც ომის დროს საკუთარი სურვილით დარჩა აფხაზეთში. დრამაში აღწერილია ესტონელი გმირის სახლში მოხვედრილი დაჭრილი ქართველი და ჩეჩენი ჯარისკაცების ურთიერთობა.
ფილმში მონაწილეობენ: გიორგი ნაკაშიძე, მიხეილ მესხი, ესტონეთში საუკუნის მსახიობად აღიარებული ლემბიტ ულფსაკი, ელმო იუგანენი და რავიო ტრასსი.
