"ნაციონალური მოძრაობა" პედაგოგთა უმრავლესობის მიერ სასერტიფიკაციო გამოცდებში მიღებულ არასახარბიელო შედეგს სახელმწიფოს მიერ მასწავლებლებისადმი გამოჩენილ უყურადღებობას უკავშირებს. პარტიის წარმომადგენელის სერგო რატიანის განცხადებით, წელს მასწავლებლებს გამოცდებისთვის მომზადების მოტივაცია გაუქრათ.

„წელს პედაგოდგთა უმრავლესობამ სასერტიფიკატო გამოცდებში ბარიერი ვერ გადალახა. ფიზიკაში ზღვარი მასწავლებელთა 96%-მა, ქიმიაში 82%-მა, მათემატიკაში - 85%-მა, ისტორიაში 57 %-მა, გეოგრაფიაში - 49%-მა ვერ გადალახა. პედაგოგთა სასერთიფიკაციო გამოცდების არასახარბიელო შედეგებს რამდენიმე მიზეზი აქვს:

წლევანდელ წელს სახელმწიფოს მხრიდან გამოჩენილი უყურადღებობა: 2013 წელს პედაგოგებს არ გაეწიათ მეთოდური დახმარება, რომელსაც წლების განმავლობაში ახორციელებდა მასწავლებლის სახლი. ტრეინინგები იყო უფასო და ჰქონდა პერმანენტული ხასიათი. "ქართული ოცნების" მიერ მასწავლებელთა საკვალიფიკაციო გამოცდების დისკრედიტაცია. მასწავლებლებს გაუქრათ მოტივაცია მომზადებულიყვნენ გამოცდებისთვის. მათ გაუჩნდათ მოლოდინი, რომ ახალი ხელისუფლების პირობებში, გამოცდები მკაცრი არ იქნებოდა", - განაცხადა რატიანმა.