საქართველოს პრეზიდენტი, თურქეთში ვიზიტის ფარგლებში ტაო-კლარჯეთს ეწვევა. როგორც “რეპორტიორს“პრეზიდენტის პრესსამსახურიდან აცნობეს, გიორგი მარგველაშვილი თურქეთის რესპუბლიკაში სახელმწიფო ვიზიტით უკვე გაემგზავრა.
ვიზიტის ფარგლებში დაგეგმილია საქართველოს პრეზიდენტის შეხვედრა თურქეთის რესპუბლიკის პრეზიდენტთან აბდულა გიულისთან, რომლის შემდეგაც ორი ქვეყნის ლიდერები ერთობლივ პრესკონფერენციას გამართავენ.
ანკარაში ვიზიტის ფარგლებში, საქართველოს პრეზიდენტი თურქეთში მცხოვრებ ქართველებსაც შეხვდება. ვიზიტის დასრულების შემდეგ, გიორგი მარგველაშვილი ტაო-კლარჯეთს ეწვევა.
ოფიციალური ცნობით, პრეზიდენტის თანმხლები დელეგაციის შემადგენლობაში არიან: საქართველოს პარლამენტის თავმჯდომარის პირველი მოადგილე მანანა კობახიძე, უშიშროების საბჭოს მდივანი ირინა იმერლიშვილი, საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე, მისი პირველი მოადგილე ზვიად კვაჭანტირაძე, პრეზიდენტის ადმინისტრაციის უფროსი ლაშა აბაშიძე, პრეზიდენტის საგარეო ურთიერთობათა მდივანი ივანე მაჭავარიანი და საქართველოს ელჩი თურქეთის რესპუბლიკაში ირაკლი კოპლატაძე.
