ხვალ,  გალერეა "ევროპის სახლში" 19:00 საათზე, ქართველი მხატვრის აკაკი გაჩეჩილაძის ნამუშევრების პერსონალური გამოფენა "ფერადი ფიქრები" გაიხსნება.

გამოფენის ორგანიზატორი და მხარდამჭერი "ენერგო-პრო ჯორჯიაა", სადაც აკაკი გაჩეჩილაძე,  2005 წლიდან აღმოსავლეთ საქართველოს ქსელის მართვის უფროსი დისპეჩერის პოზიციაზე მუშაობს. გაჩეჩილაძე პროფესიით ენერგეტიკოსია, თუმცა საკუთარ თავს მხატვრობაშიც ხედავს.

აღნიშნული გამოფენა მხატვრის ყველაზე მასშტაბური პერსონალური გამოფენაა, რომელზეც 60 ფერწერული ტილო იქნება  წარდგენილი. 

გამოფენაზე "ფერადი ფიქრები"  წარმოდგენილი ნამუშევრების უმეტესობა 2013 წელსაა შესრულებული, თუმცა დამთვალიერებელი შეძლებს მხატვრის გასული წლის ტილოებიც დაათვალიეროს.

მხატვრის დებიუტი გერმანიაში შედგა. ქალაქ მერბურში, 2010 წელს მან ჯგუფურ გამოფენაში მიიღო მონაწილეობა, ხოლო 2011 წელს პერსონალური გამოფენა გამართა. ასევე 2011 წელს ქალაქ ჰამბურგში ჯგუფურ გამოფენაში მონაწილეობდა. 2012 წელს ორი პერსონალური გამოფენა გაიმართა, ქალაქ დუსელდორფში („Akaki Aus Tiflis" და "ფანტასტიკური რეალიზმი").

აკაკი გაჩეჩილაძეს მიღებული აქვს მონაწილეობა საერთაშორისო ღონისძიებებსა და არტ ფესტივალებში. მხატვრის ნამუშევრები დაცულია კერძო კოლექციებში (უკრაინა, საქართველო, გერმანია, საფრანგეთი, ისრაელი, რუსეთი, ჩეხეთი, პოლონეთი, ესპანეთი).

გამოფენა  26 იანვრის ჩათვლით გაგრძელდება.