„კავკასიელ ხალხთა კონფედერაციის თავმჯდომარე", ექსპერტი ზაალ კასრელიშვილი ლტოლვილთა და განსახლების სამინისტროს ყოფილი თარჯიმანის საიხან მუზაევის განცხადებას „ნაციონალურ მოძრაობასთან" აკავშირებს. ამის შესახებ ზაალ კასრელიშვილმა, დღეს, „რეპორტიორის" პრესკლუბში გამართულ პრესკონფერენციაზე ისაუბრა.
„საინტერესოა, როგორ გამოეხმაურა ეს ადამიანი ლაფანყურის სისხლიან ინციდენტს თავის დროზე. ეჭვი გვაქვს, რომ ადამაინს „ნაციონალური მოძრაობის" ტონი აქვს და უნდა, რომ შედეგები, რომელიც დაიდება - ეჭვქვეშ დააყენოს მანამ, სანამ გამოქვეყნდება. ყველაფერი გარკვეულია, დამნაშავეები ქართველი თანამდებობის პირები სახელებით და გვარებით დასახელებულნი არიან და მათ შესახებ უკვე იცის მთელმა კავკასიამ და კავკასიის ფარგლებს გარეთ მცხოვრებმა დიასპორებმა, 21 ქვეყანაში", - განაცხადა ზაალ კასრელიშვილმა.
მუზაევმა ქართული სპეცსამსახურები ლაფანყურის სპეცოპერაციის თემაზე ცრუ ჩვენებების მოპოვებაში დაადანაშაულა. მისი განცახდების თანახმად, უკვე რამდენიმე თვეა მას სპეცსამსახურის თანამშრომლები სთხოვენ, მისცეს ცრუ ჩვენება და განაცხადოს, რომ ლაფანყურის სპეცოპერაცია, წინა ხელისუფლების ყოფილი მაღალჩინოსნების - მათ შორის სანდრო ამირიძისა და გია ლორთქიფანიძის მიერ იყო დადგმული. საიხან მუზაევი ირწმუნება, რომ მასზე ფსიქოლიგიურ ზეწოლას ახორციელებენ და უკანონოდ აუკრძალეს ქვეყნიდან გასვლა. მისი თქმით, ის 18 იანვარს ლონდონში გამგზავრებას აპირებდა, თუმცა თბილისის საერთაშორისო აეროპორტში საზღვარზე არ გაატარეს და არც განუმარტავთ მიზეზები, რის გამოც ქვეყნის დატოვების უფლება არ მისცეს.
