გამყოფი ხაზის გასწვრივ მდებარე სოფლებში თითო ოჯახზე გათვალისწინებული 500 ლარიანი დახმარებები უკმაყოფილებას იწვევს. ამის შესახებ ქარელის მუნიციპალიტეტის გამგებლის მოვალეობის შემსრულებელი ზაზა გულიაშვილი ტერიტორიული ორგანოების სპეციალისტებს საყვედურობს. მისი თქმით, აღნიშნული დახმარების მიზნობრიობის შესახებ მოსახლეობას სპეციალისტები სათანადო განმარტებას არ აძლევენ.

„ეს ყველაფერი კი ჩვენ გვბრალდება, ტერიტორიული ორგანოების რწმუნებულებთან ერთად", - აცხადებს გულიაშვილი.

გაეროს ლტოლვილთა უმაღლესი კომისარიატის პროგრამით, გამყოფილი ხაზის გასწვრივ მდებარე სოფლებში უკიდურესად გაჭირვებული ოჯახები ერთჯერად დახმარებებს იღებენ. ფულად დახმარებასთან ერთად მოსახლეობას პირველადი საჭიროების ნივთებიც ურიგდებათ.

„როგორც ჩანს, ტერიტორიული ორგანოების სპეციალისტები სათანადო ინფორმაციას არ ფლობენ. ხალხს ჰგონია, რომ ამ დახმარებას გამგეობა გასცემს. მე პრეტენზია, მხოლოდ, სპეციალისტებთან მაქვს. უამრავ ადამიანთან მე მიწევს ახსნა-განმარტების მიცემა იმის შემდეგ, რაც სპეციალისტებმა მათთან არასწორი ინფორმაცია მიიტანეს. იცით, რომ პატარა რაიონია. ერთი სპეციალისტი იტყვის რამეს და შემდეგ მთელ რაიონში ვრცელდება. ამიტომ მოსახლეობასთან მიიტანეთ სწორი ინფორმაცია", - განაცხადა შიდა ქართლის საინფორმაციო ცენტრთან საუბარში გამგებელმა.

(მოამზადა ლილუ მიროტაძემ)