შოთა რუსთაველის სახელმწიფო თეატრის დიდი სცენა ანსამბლ „მთიების“ სოლო კონცერტს სახელწოდებით -„ზარი“ უმასპინძლებს. კონცერტი 3 თებერვალს გაიმართება, რომელიც ანსამბლის ხელმძღვანელის გიგი გარაყანიძისა და ამავე თეატრის წევრის გიგა ხაინდრავას ხსოვნას მიეძღვნება.
კონცერტი ორი ნაწილისგან შედგება. პირველ განყოფილებაში სიმღერის თანხლები გლოვის რიტუალთა ერთობლიობა გარდაცვალებიდან წლისთავამდე იქნება წარმოდგენილი. მეორე ნაწილი კი სააღდგომო ტრადიცია „ჭონით“ დაიწყება და ხალხური სიმღერების სხვადასხვა ინტერპრეტაციით შესრულდება.
ფოლკლორის ცენტრის ინფორმაციით, "მთიები" პირველყოფილი უშუალობითა და ბუნებრიობით შეასრულებს ქართველი ერის მიერ საუკუნეთა განმავლობაში შექმნილ მუსიკალურ ნიმუშებს, რომლებიც ქართულ-ეთნოგრაფიულ გარემოში წეს-ჩვეულებების, რიტუალებისა და ყოფის განუყოფელი ნაწილია და ცეკვა - ფერხულებსა ან მსვლელობებთან ერთად თეატრალიზებულ სანახაობას ქმნის.
თეატრის ჰოლში გოგა ხაინდრავას ფოტოგამოფენაც მოეწყობა.
