საქართველოს კულტურის სამინისტრომ საქართველოს კულტურის პოლიტიკის კონცეფცია შეიმუშავა.
როგორც სამინისტროში აცხადებენ, კონცეფციის შემუშავება ქვეყანაში მიმდინარე ევროინტეგრაციის პროცესებს წაადგება, ვინაიდან ასოცირების შეთანხმება კულტურის სფეროშიც არაერთი ვალდებულების შესრულებას მოითხოვს.
კონცეფცია კულტურის პოლიტიკის სტრატეგიის შემუშავებასა და მისი შესრულების დაგეგმვას დაედება საფუძვლად.
სამინისტროს განმარტებით, კონცეფციის შემუშავების მთავარი მიზეზი ამ დრომდე მკაფიოდ ჩამოყალიბებული სახელმწიფო პოლიტიკის არქონა იყო.
მინისტრის ბრძანებით, გასული წლის ივლისის თვეში კულტურის პოლიტიკისა და სტრატეგიის შემუშავების დროებითმა კომისიამ ფუძემდებლური დოკუმენტი შეიმუშავა, რომლითაც კულტურის პოლიტიკის ღირებულებები და ძირითადი მიმართულებები დადგინდა.
ამ საკითხზე მომუშავე კომისია ოთხი თვის განმავლობაში მუშაობდა და მისი შემადგენლობა შესაბამისი საექსპერტო კვალიფიკაციის მიხედვით იყო შერჩეული.
