ბათუმის მიმდებარედ, ურეხის ბავშვთა სახლში თვითნებურად შეჭრილი ეკომიგრანტები და უფლებადამცველი თამაზ ბაკურიძე ხელისუფლებას საცხოვრებელი პირობების შექმნას თხოვს. ამის თაობაზე ბათუმის დემოკრატიული ჩართულობის ცენტრში ბრიფინგი გაიმართა. ბაკურიძის თქმით, ეკომიგრანტებმა დროებითი თავშესაფრის პოვნა შეძლეს და მთავრობა ვალდებულია დაზარალებულ მოსახლეობას დაეხმაროს.
"არსებული რეალობიდან გამომდინარე, ჩანს, რომ ვიღაცას ჰგონია ეს რეგიონი ერთი დიდი ბანკი და მოსახლეობა კლიენტები. აჭარაში მყოფ ეკომიგრანტებთან დაკავშირებით აშკარად გამოიკვეთება ხელისუფლების უსუსურობა და უპასუხისმგებლობა. ბოლოს და ბოლოს, ადამიანებმა გადაწყვიტეს თავად ენახათ თავშესაფარი. ისინი შევიდნენ ურეხის უპატრონო ბავშვთა სახლში. ეს შენობა სახელმწიფოს ბალანსზეა და სახელმწიფო გვეუბნება, რომ მათ უნდა დატოვონ შენობა",
- აღნიშნა თამაზ ბაკურიძემ.
