სახელმწიფო მინისტრი შერიგებისა და სამოქალაქო თანასწორობის საკითხებში, პაატა ზაქარეიშვილი აცხადებს, რომ "11-კილომეტრიან უსაფრთხოების ზონაში ე.წ. საკომენდანტო საათი მოქმედებს".
"კარგად ვიცი, რაც ხდება იქ, მაქვს კონტაქტები აფხაზურ მხარესთან და ზედმიწევნით კარგად ვიცი, როგორ გამოიყურება ეს ყველაფერი. ანუ საქართველოს სახელმწიფო საზღვრის სიღრმეში, 11 კილომეტრის ზონაში, აღიარებულია, რომ არსებობს უსაფრთხოების ზონა, რომელიც თვალნათლივ არაფრით ჩანს. შეიძლება ვთქვათ, რომ 11-კილომეტრიან ზონაში მოქმედებს ე.წ. საკომენდანტო საათი. ანუ რუს ოკუპანტებს შეუძლიათ გააჩერონ ნებისმერი ადამიანი, გაუჩხრიკონ ჩანთა, შესაძლოა, ბინაში შევიდნენ, სახლში შევიდნენ ამ 11-კილომეტრიან ზონაში. სხვა ხილული ნიშნები არ ჩანს, გარდა იმისა, რომ გზაზე იდგეს რაღაც სამხედრო მანქანა, რომელმაც შესაძლოა, სხვა კერძო მანქანა გააჩეროს", - განაცხადა ზაქარეიშვილმა.
საგარეო საქმეთა მინისტრის მაია ფანჯიკიძის განცხადებით, 11-კილომეტრიანი უსაფრთხოების ზონა, რომელიც ვითომდა სოჭის ოლიმპიადის კონტექსტში შეიქმნა, შესაძლოა, დარჩეს ისე, როგორც დღეს არის.
