მიკროავტობუსის მძღოლებისთვის მარშრუტზე მოძრაობის გადასახადი დღეიდან ეტაპობრივად გაიაფდება. როგორც "თბილისის მიკროავტობუსის" გენერალურმა დირექტორმა, დავით ასანიძემ განაცხადა, საზაფხულო სეზონის დადგომასთან და მგზავრთა ნაკადის კლებასთან დაკავშირებით, კომპანია მძღოლებს საზაფხულო მოსაკრებელს უწესებს. მოსაკრებელი, რომელიც, დღიურად, საშუალოდ, 55 ლარს შეადგენს, მძღოლებისთვის 20%-30%-მდე შემცირდება. რანჟირება კონკრეტული სამარშრუტო ხაზების დატვირთვიდან გამომდინარე მოხდება. "მოსაკრებლის დაკლება იმ ხაზების მძღოლებს შეეხებათ, სადაც მგზავრთა ნაკადის კლება ფიქსირდება. ეს შეღავათი, მძღოლებს, მგზავრთა ნაკადის კლებით გამოწვეული, შემცირებული შემოსავლების დარეგულირების საშუალებას მისცემს", - აღნიშნა ასანიძემ. საზაფხულო მოსაკრებლები 15 სექტემბრამდე იმოქმედებს.
