სასჯელაღსრულების, პრობაციისა და იურიდიული დახმარების საკითხთა მინისტრმა სოზარ სუბარმა, სასჯელაღსრულების დეპარტამენტის სპეცდანიშნულების მთავარი სამმართველოს ბაზაზე, აგვისტოს ომში დაღუპული ოთხი თანამშრომლის ხსოვნას პატივი მიაგო.
სპეცდანიშნულების მთავარი სამმართველოს გარე დაცვის რიგითები გიორგი აბიათარი, ბესიკ მამიაური, გოჩა ილურიძე და ილია შავერდაშვილი 2008 წლის 8 აგვისტოს, სოფელ ერედვში, რუსეთის ფედერაციის შეიარაღებული ძალების მიერ საქართველოს სუვერენულ ტერიტორიაზე შემოჭრისა და დამოუკიდებელი სახელმწიფოს წინააღმდეგ ფართომასშტაბიანი სამხედრო აგრესიის განხორციელებისას დაიღუპნენ.
სოზარ სუბარმა დაღუპული ჯარისკაცების განახლებული მემორიალი თაიგულით შეამკო და ახლადშექმნილი მემორიალური კუთხე მოინახულა.
დღესვე სპეცდანიშნულების მთავარი სამმართველოს თანამშრომლები ომში დაღუპულთა საფლავებზე გავიდნენ და ჯარისკაცებს სამხედრო პატივი მიაგეს.
დაღუპული ჯარისკაცები ყვარლის, ახმეტისა და დედოფლისწყაროს რაიონებში არიან დაკრძალული.
