უზენაესი საბჭოს ყოფილი დეპუტატი, თენგიზ დიხამინჯია საკონსტიტუციო ცვლილებების აუცილებლობაზე საუბრობს. მისი განმარტებით აუცილებელია შეიქმნას საყოველთაო სახალხო ორგანო -„საკონსტიტუციო კონგრესი" რომელიც კონსტიტუციაში შესატან ცვლილებებზე იმუშავებს. „ამ ჯგუფში არიან როგორც „ქართული ოცნების" ასევე „ნაციონალური მოძრაობის" წარმომადგენლები, იურისტები, რომლებიც კონსტიტუციაზე მუშაობდნენ და სხვადსხვა მოწვევის პარლამენტის დეპუტატები. მთავარი მიზანი კი კონსტიტუციური ჩიხიდან გამოსვლაა. დღევანდელი კონსტიტუცია ერთი კაცის ინტერესებზეა აგებული და ეს უნდა შეიცვალოს" - განაცხადა „რეპორტიორის" პრესკლუბში თენგიზ დიხამინჯიამ. მისივე განცხადებით, საინიციატივო ჯგუფი უკვე მუშაობს კონსტიტუციის იმ მუხლზე, რომლის მიხედვითაც ქვეყნის პრეზიდენტს, პრემიერ-მინისტრს და პარლამენტის თავჯდომარეს ორმაგი მოქალაქეობის უფლება აქვს. „ეს მუხლი შესაძლოა ქვეყნის ინტერესებთან წინააღმდეგობაში მოვიდეს. ორმაგი მოქალაქეობის უფლება მაღალი თანამდებობის პირებს არ უნდა ჰქონდეთ" - განაცხადა თენგიზ დიხამინჯიამ.
