უკრაინის ახალი პრემიერის არსენ იაცენიუკის განცხადებებმა აფხაზეთის შესახებ, დე ფაქტო რესპუბლიკის ხელმძღვანელობის აღშფოთება გამოიწვია. ამასთან დაკავშირებით, აფხაზეთის დე ფაქტო საგარეო საქმეთა სამინისტრომ განცხადება გაავრცელა.

„რესპუბლიკა - აფხაზეთს ყოველწლიურად, სხვადასხვა ქვეყნიდან მილიონზე მეტი ტურისტი მოინახულებს, იხსნება ახალი სასტუმროები, რესტორნები, კაფეები და სხვა ტურისტულ-რეკრეაციული ინფრასტრუქტურა", - აღნიშნეს სამინისტროში.

სოხუმში ასევე შეაფასეს უკრაინის ბოლო მოვლენები. „ამ სისტემას კოორდინირებას ფაქტობრივად უწევენ ექსტრემისტები და ფაშისტები, რომელთა შორის არიან ისნიც, ვინც ქართულ ბანდფორმირებებში იბრძოდა აფხაზი ხალხის წინააღმდეგ 1992-1993 წლებში", - განაცხადეს დე ფაქტო სამინისტროში.

ცნობისთვის: უკრაინის პრემიერმა არსენ იაცენიუკმა აფხაზეთის შესახებ ისაუბრა. „მე მივიღე მონაცემები იმის შესახებ, თუ როგორ ცხოვრობს დღეს ხალხი აფხაზეთში. იქ ადამიანებს არ აქვთ არც სამსახური, არც ხელფასი და არც უსაფრთხოება. უკვე აღარც ვსაუბრობ იმაზე, რომ მათ დაავიწყდათ თუ როგორ გამოიყურებიან დამსვენებლები. სამაგიეროდ, იქ არის ბანდფორმირებები დანგრეული სანატორიუმები, იქ ვაჭრობენ იარაღით, ნარკოტიკებით - აი, რა ხდება ამ ტერიტორიებზე. ასეთი ბედი სურთ „მწვანე კაცუნებს" რომლებიც ახლა სულ 18 ათასს შეადგენენ და ყირიმის მთელს ტერიტორიაზე გადაადგილდებიან", - განაცხადა იაცენიუკმა.