ერგნეთში ინციდენტების პრევენციისა და მასზე რეაგირების მექანიზმების სამუშაო ჯგუფის შეხვედრა მიმდინარეობს. შეხვედრის დაწყებამდე ოსური ჯგუფის ხელმძღვანელს ხოხ გაგლოითს კომენტარი არ გაუკეთებია. საქართველოს შინაგან საქმეთა სამინისტროს ანალიტიკური დეპარტამენტის წარმომადგენელის კახა ქემოკლიძის განცხადებით კი, ქართული მხარე დღევანდელ შეხვედრაზე ქარელის რაიონის სოფლებში ატოცსა და ღოღეთში შექმნილ მდგომარეობას განიხილავს. გარდა ამისა, ქართული მხარე გააპროტესტებს ბოლო პერიოდში საქართველოს საჰაერო სივრცის დარღვევის ფაქტებს.
გარდა ამისა, ერგნეთში დღეს სიახლეც არის - ინციდენტების პრევენციის ფორმატში მიმდინარე შეხვედრების რამდენიმეწლიანი ისტორიის მანძილზე, პირველად, დღეს მეორე კარავი დაიდგა, აღნიშნული კარავი მედიის წარმომადგენლებისთვის არის გათვალისწინებული. ევროკავშირის სადამკვირვებლო მისიის წარმომადგენლებმა ჟურნალისტებს პროფესიული დღეც მიულოცეს და განაცხადეს, რომ პრესამ უფრო კომფორტულად რომ შეძლოს მუშაობა, სწორედ აქედან გამომდინარე მიიღეს გადაწყვეტილება, კიდევ ერთი კარავი დადგმულიყო მედიისთვის.
ამ დროისათვის კარავში, ჯერჯერობით, მხოლოდ ქართველი ჟურნალისტები არიან. რაც შეეხება ცხინვალის მედიის წარმომადგენლებს, ისინი პრესისთვის განკუთვნილ კარავში ამ დრომდე არ გამოჩენილან.
