განათლების ხარისხის განვითარების ეროვნული ცენტრის დირექტორის, ელენე ჯიბლაძის განცხადებით, სტუდენტებს წელიწადში ორჯერ ეძლევათ შესაძლებობა, მობილობით ისარგებლონ და გადავიდნენ ერთი უმაღლესი დაწესებულებიდან სხვა უმაღლეს საგანმანათლებლო დაწესებულებაში. 

ამისთვის სტუდენტი უნდა დარეგისტრირდეს და გააკეთოს არჩევანი ონლაინ რეჟიმში, ცენტრის ვებგვერდზე: WWW.students.eqe.ge მიმდინარე წლის 12 აგვისტოს, 11:00 საათიდან, 30 აგვისტოს 24 საათის ჩათვლით. სოციალურად დაუცველი ოჯახების წარმომადგენელი სტუდენტები თავისუფლდებიან მობილობის საფასურის გადასახადიდან. სტუდენტებს შეუძლიათ, აირჩიონ 5 საგანმანათლებლო პროგრამა. მობილობის კონკურსი ხორციელდება სტუდენტის მიერ ერთიან ეროვნულ გამოცდებზე დაგროვებული სკალირებული ქულის მიხედვით.
"წელს სიახლე გვაქვს მობილობის პროცესში, სტუდენტს, რეგისტრაციის დაწყებიდან შედეგების გამოქვეყნების დღის ჩათვლით, მიუვა სმს შეტყობინება. დღესითვის 64 უმაღლესი სასწავლებლიდან, კანონმდებლობის შესაბამისად, მობილობის პროცესში 5 საგანმანათლებო დაწესებულება არ მონაწილეობს. დარჩენილი 59 უმაღლესიდან ვაკანტური ადგილები გამოაცხადა 52-მა. სახელმწიფო უმაღლესი სასწავლებლებიდან მობილობის პროცესში არ მონაწილეობს ილიას სახელმწიფო უნივერსიტეტი."- განაცხადა ელენე ჯიბლაძემ.  2013-2014 წლის საშემოდგომო მობილობის პროცესში გამოცხადებულია 7 733 ვაკანტური ადგილი.