საქართველოს პრეზიდენტი გიორგი მარგველაშვილი და მსახიობი და ვიზაჟისტი მაკა ჩიჩუა რამდენიმე წელია ერთად არიან. ჩიჩუა „კვირის პალიტრის" ჟურნალისტის შეკითხვას პასუხობს, რომელიც დაინტერესდა - რა შეიცვალა მის ცხოვრებაში მარგველაშვილის პრეზიდენტად არჩევის შემდეგ.
„ისევე ვცხოვრობ, როგორც ადრე, უბრალოდ, პასუხისმგებლობა გაიზარდა. ყველას ჰგონია, რომ განსაკუთრებული რეჟიმი მაქვს, ან ჩემს ცხოვრებაში რაიმე რადიკალური ცვლილებები მოხდა... ზოგადად, ყველა ეტაპს თავისი ცვლილება მოაქვს და ეს გასაკვირი არც არის. ალბათ, ცვლილებების გარეშე ცხოვრება უინტერესოც იქნებოდა. უპირველესად, მე საყვარელ ადამიანთან ვცხოვრობ, საყვარელ ადამიანთან ცხოვრება კი რთული ნამდვილად არ არის", - აცხადებს ჩიჩუა.
რაც შეეხება იმას, რამდენად აქტიურობს სოციალურ ქსელებში და როგორ რეაგირებს ჭორებზე, ჩიჩუა აცხადებს, რომ ჭორებზე ნაკლებად რეაგირებს.
„არასდროს ვყოფილვარ სოციალური ქსელების აქტიური მომხმარებელი. Facebook-საც იშვიათად, მხოლოდ იმ შემთხვევაში ვიყენებ, თუ ამის სურვილი მიჩნდება, ჭორებზე კი ნაკლებად ვრეაგირებ", - აცხადებს ჩიჩუა.
(მოამზადა ლილუ მიროტაძემ)
