გაზეთ „კვირის პალიტრასთან“ ერთად ბავშვობაში დაბრუნება კიდევ ერთმა მაღალჩინოსანმა ისურვა. დავით ნარმანია მალე დატოვებს ინფრასტრუქტურისა და რეგიონული განვითარების სამინისტროს და თბილისის მერობისთვის ბრძოლაში ჩაებმება. ნარმანია გამოცემასთან პირველ სიყვარულს იხსენებს.
„ბავშვობა სამი-ოთხი წლიდან მახსოვს. საბავშვო ბაღი, კანფეტები, ლექსები, დღესასწაულები, ზეიმი საახალწლოდ და რა ვიცი, რომელი აღარ. დროდადრო ფიქრით ვბრუნდები ხოლმე იქ და ვიხსენებ, რა ახარებთ ბავშვებს. როგორც კი ამაზე ფიქრსა და ბავშვობას ივიწყებ, რეალობას ეთიშები. პირველი სიყვარული ბაღში იყო თუ არა? დიახ, იყო. იმ გოგოს სულ მატყუარა საწოვარა ჰქონდა პირში და დროდადრო ვთხოვდი, ჩემთვის დაეთმო. ოჯახში ვამბობდი კიდეც, გოგო მიყვარს-მეთქი. მრავალი წელი რომ გავიდა და ერთხელაც ქუჩაში შემხვდა, ვუყურებდი და მეღიმებოდა. იმდროინდელი სიყვარულიც მატყუარა ყოფილა საწოვარასავით. დამრჩა მხოლოდ ულამაზესი მოგონება, რომელიც კარგ განწყობაზე მაყენებს“, -იხსენებს მინისტრი.
(მოამზადა ლილუ მიროტაძემ)
