ვახტანგ რჩეულიშვილი თბილისის მერის განცხადებას გამოეხმაურა. „რეპორტიორთან“ საუბარში რჩეულიშვილი მოხარულია, რომ აღნიშნული დავა სასამართლოში გადაინაცვლებს. „ის, რომ გიგი უგულავა გამოგვეხმაურა, ძალიან კარგია. წინა ხელისუფლების პირობებში მათი კრიტიკა ძალიან ძნელი იყო. ეხლა უკვე ყველაფერს სასამართლო გაარკვევს, რაც ძალიან მიხარია. ჩვენ საბუთები გვაქვს ხელთ, რომელსაც სასამართლოს წარვუდგენთ და შემდეგ ისინი გაარკვევენ, ვინ არის სახელმწიფო მოღალატე და ვინ აფერისტი“, – განაცხადა რჩეულიშვილმა. თბილისის მერის განცხადებით, მას უხარია, რომ ერთის მხრივ მისი ბრალდების მთავარი მოწმე საერთაშორისო დონის აფერისტი ჯოზეფ ქეია და მეორეს მხრივ, ლოკალური დონის აფერისტი ვახტანგ რჩეულიშვილი. „მესმის, რომ რჩეულიშვილი ოჯახში მამაკაცია და ცდილობს ქალბატონების დაცვას, თუმცა იგი ამას აკეთებს უღირსად და უსირცხვილოდ და გულისამრევი ფორმით... რაც დღეს ხდება აწყობს ერთადერთ ადამიანს – რჩეულიშვილს და არ აწყობს იმ ათასობით ოჯახს, რომელთაც პირი აქვს დაფჩენილი და უშედეგოდ ელოდება ბინების დაბრუნებას... ეს ყველაფერი მივა სასამართლოში“. – აცხადებს გიგი უგულავა.
