მართლმადიდებელი ეკლესია, დღეს „ერთს ათორმეტთაგანს - დიდ საეკლესიო დღესასწაულს,"-  ხარებას ზეიმობს.

ერთ-ერთ უდიდეს საუფლო დღესასწაულს, რომელსაც წმიდა ეკლესია 25 მარტს (ახ. სტილით 7 აპრილს) აღნიშნავს,  ყოვლადწმიდა მარიამთან ერთად მთელ კაცობრიობას ეუწყა, რომ სახიერმა ღმერთმა ადამიანი სიკვდილისა და ცოდვის სამუდამო ტყვეობისათვის ვერ გაიმეტა და ეშმაკის მონობისაგან მისი გამოხსნა გადაწყვიტა. ეს დღე არის დასაბამი „ჩვენი ცხონებისა და გამოჩინება საუკუნოითგან დამალულისა საიდუმლოისა".

დღესასწაულთან  დაკავშირებით, ტაძრებში სადღესასწაულო წირვა-ლოცვა აღევლინება.  სრულიად საქართველოს კათოლიკოს-პატრიარქი, უწმინდესი და უნეტარესი, ილია მეორე კი წირვა-ლოცვას სვეტიცხოველში აღასრულებს.

ხარება ოდითგან მიიჩნეოდა დიდ უქმედ. ხალხში გავრცელებული იყო გამოთქმა: „ხარებას ჩიტიც კი არ აგებსო ბუდეს" - ანუ, ამ დღეს არ შეიძლებაო მუშაობა.  იყო ასეთი მინიშნებაც - „როგორც გაატარებ ამ დღეს, ისეთი იქნებაო შენთვის მთელი წელიწადი!"

(მოამზადა დიანა ლიპარტელიანმა)