ევროკავშირის სადამკვირვებლო მისია "TV 3"-ის გადამღები ჯგუფის გათავისუფლებას მიესალმება. როგორც ევროკავშირის სადამკვირვებლო მისიის მიერ გავრცელებულ ინფორმაციაშია ნათქვამი, სადამკვირვებლო მისია მიესალმება, გუშინ, გორის რაიონის სოფელ აძვის მახლობლად, ადმინისტრაციული საზღვრის გადაკვეთისთვის დაკავებული სამი ჟურნალისტის გათავისუფლებას.
"მათი გათავისუფლების ხელშესაწყობად ევროკავშირის სადამკვირვებლო მისიამ დაუყოვნებლივ აამოქმედა ცხელი ხაზი და მუდმივ კონტაქტზე იყო ყველა მხარესთან, დღეს, ჟურნალისტების გათავისუფლებამდე.
აღდგომის დღესასწაულის პერიოდში, ევროკავშირის სადამკვირვებლო მისია ყველა მხარეს მოუწოდებს მაქსიმალური შემწყნარებლობისა და ურთიერთპატივისცემისკენ, რაც საშუალებას მიცემს ადგილობრივ მოსახლეობას აღნიშნოს მართლმადიდებელ მორწმუნეთათვის ეს მნიშვნელოვანი რელიგიური დღესასწაული საერთო ტრადიციების შესაბამისად, მშვიდ და უსაფრთხო გარემოში", -ნათქვამია ევროკავშირის სადამკვირვებლო მისიის მიერ გავრცელებულ განცხადებაში.
