იერუსალიმში, მაცხოვრის საფლავზე წმინდა ცეცხლი თბილისის დროით 15:17 საათზე გადმოვიდა. სასწაული კიდევ ერთხელ განმეორდა. წმინდა ცეცხლი იერუსალიმის მართლმადიდებელთა პატრიარქმა თეოფილოს III- მ გამოიტანა. ათასობით მორწმუნე ცეცხლს ერთმანეთს უნაწილებს. 

ზეციური ცეცხლის გადმოსვლა უტყუარი ნიშანია მართლმადიდებელი ეკლესიის სწავლების ჭეშმარიტებისა და მასში მადლის არსებობისა. საფლავთან შეკრებილი მრევლი წმინდა ცეცხლის გარდამოსვლას დღეს დილიდან ელოდებოდა.

იერუსალიმში, მაცხოვრის საფლავზე ზეციური ცეცხლის გადმოსვლას საქართველოს საპატრიარქოდან 1280 მომლოცველი დაესწრო. წმინდა ცეცხლს საქართველოში ბოლნელი მთავარეპისკოპოსი ეფრემი ჩამოიტანს. მომლოცველები წმინდა ცეცხლს თბილისში ჩარტერული რეისით სავარაუდოდ, 19 აპრილს, 23:00 საათისთვის ჩამოიტანენ.

მოციქულთა და წმინდა მამათა მოწმობით, უნივთო ცეცხლმა მაცხოვრის საფლავი ჯერ კიდევ აღდგომისას გააბრწყინა. ზეციური ცეცხლი იერუსალიმის აღდგომის ტაძარში პირველად III საუკუნეში გადმოვიდა. გადმოცემით, სააღდგომო ლიტანიობაზე კანდელში ზეთი შემოაკლდათ და პატრიარქმა ნარცისმა კურთხევა გასცა, მათში სილოამის ემბაზის წყალი ჩაესხათ. როდესაც პატრიარქის კურთხევა შეასრულეს, ზეციდან ცეცხლი გადმოვიდა და კანდელები აანთო, რომლებიც მთელი ლიტანიობის განმავლობაში არ ჩამქრალა.