ექსპერტი არჩილ გამზარდია იერუსალიმში არასდროს ყოფილა, თუმცა ყველაზე მეტად საკუთარი მეუღლის  მოსმენა უყვარს, როცა ის  იერუსალიმის ისტორიებს უყვება - „ეს ყოფილა ურთულესი გზა, საკვირველია, როგორ უძლებს ადამიანი 10 სათიან რიგში დგომას, უწყლოდ და საბოლოოდ როგორი გაძლიერებული სულით გამოდის იქიდან.“- ამბობს გამზარდია „რეპორტიორთან“ საუბარში. ის თვლის, ერთმანეთს ბრწინვალე აღდგომას წელიწადის ყველა დღეს უნდა ვულოცავდეთ.

„რთულია ადამიანმა ბოლომდე გააცნობიერო აღდგომის საიდუმლო, თუმცა ვცდილობ ბოლომდე გავიაზრო ზღვარი სიცოცხლესა და სიკვდილს შორის. ადამიანები, როგორც წესი, აღდგომის მოახლოებასთან ერთად ვიწყებთ ფიქრს, იმაზე, რომ  უფალმა სიკვდილით გაიმარჯვა სიკვდილზე. რამდენჯერმე შევხვდი მონასტერში ამ დღეს, როგორც იქაურობის მასპინძელი და საოცარი განცდაა. სულ მეხუმრებიან - ღმერთი მარტო მონასტერში არ არისო. რა ვქნათ, რომ   ადგილებს, სივრცეს განსაკუთრებულ ყურადღებას ვანიჭებთ, ეს ალბათ მცირედმორწმუნეობის ბრალია. გარემო გვჭირდება იმისთვის, რომ კარგად მოვიქცეთ. ბოლო სამი წელი ჩემთვის ამ დღესასწაულის ხარისხი კიდევ უფრო გაიზარდა. ლაზარეს შაბათს ვაჟი მეყოლა, ამიტომ გამორჩეულია მთლიანად ვნების კვირა. მახსოვს, ერთ-ერთი მოძღვარი საუბრობდა, რომ არსებობდა მამაო, რომელიც ადამიანებს 365 დღის განმავლობაში ულოცავს აღდგომას და მე ვფიქრობ  ეს ყველაზე სწორია.“-ამბობს გამზარდია.