როგორც დღევანდელ პრესკონფერენციაზე „TBILISI FASHION WEEK"-ის ორგანიზატორებმა განაცხადეს , ერთწლიანი შესვენების შემდეგ, თბილისის მოდის კვირეული დაბრუნდა და 6-დან 10 მაისის ჩათვლით ძირითადი ჩვენებები „ვარდების ბაღში" გაიმართება.

დღევანდელ პრესკონფერენციას ის უცხოელი დიზაინერები, ბლოგერები, კრიტიკოსები და ჟურნალისტები დაესწრნენ, რომლებიც „თბილისის მოდის კვირეულში" მონაწილეობენ.

„თბილისის მოდის კვირეული" ატელიე „კიკალას" და გოლა დამიანის (დალოოდ ჯგუფი) შემოდგომა/ზამთრის 2014-15 წლის კოლექციების ჩვენებით გაიხსნება. თბილისის მოდის კვირეულის ძირითად პროგრამაში 20-მდე ქართველი დიზაინერის ჩვენება მოეწყობა და თავიანთ პროდუქციას ავთანდილი, მოდის სახლი „მატერია" დათუნა სულიკაშვილი, გიორგი შაღაშვილი, ლელა ელოშვილი, ქეთი ჩხიკვაძე, აკა ნანიტაშვილი, თეონა გარდაფხაძე და „Salle de Mode" წარმოადგენენ.

მოდის კვირეულზე წელს ახალი სახელებიც გამოჩნდებიან და თავიანთ მოდელებს წარმოადგენენ. 10 მაისს დამწყებ დიზაინერთა კონკურსი გაიმართება, რომლის ჟიურიში უცხოელი სტუმრები იქნებიან. მათ შორის, იტალიელი მოდის კონსულტანტი ჯანი ფონტანა და სერენა ტოფეტი, რომლებიც გამარჯვებულ ნიუქამერს სპეციალური პრიზით დააჯილდოვებენ. კვირეულის ფარგლებში, თბილისის კულტურული ღონისძიებების ცენტრის მხარდაჭერით გაიმართება მასტერკლასები. მათზე დასწრების შესაძლებლობა ყველა მსურველს ექნება, განსაკუთრებით სახელოვნებო უნივერსიტეტებიდან.