სანდრო გირგვლიანის საქმეში ბრალდებული დავით ჩხიტუნიძის ადვოკატები მოითხოვენ რომ მათი დაცვის ქვეშ მყოფის საქმე ცალკე იქნას განხილული. ადვოკატების მტკიცებით ჩხიტუნიძეს გირგვლიანის საქმესთან არანაირი კავშირი არ აქვს.
ჩხიტუნიძის ადვოკატის, დალი იმნაიშვილის განცხადებით, მისი დაცვის ქვეშ მყოფს ათენის სასჯელაღსრულების დაწესებულებაში ქართველი პატიმრები გაუსწორდნენ. რომელთა საქმესაც დავით ჩხიტუნიძე თავის დროზე იძიებდა.
„ როდესაც მოხდა მისი შესახლება ათენის საპყრობილეში, იქ დახვდა 80 თავისუფლება აღკვეთილი. როგორც ჩვენთვის ოჯახიდან და სხვადასხვა წყაროებიდან არის ცნობილი, დავით ჩხიტუნიძე იცნეს, როგორც მათი ყოფილი გამომძიებელი და პატიმრები დაემუქრნენ. ამის შემდეგ მოხდა ანგარიშსწორებაც."- აცხადებს იმნაიშვილი.
ადვოკატები ჩხიტუნიძის დაუყოვნებლივ ექსტრადიციას ითხოვენ.
შეგახსენებთ, რომ იუსტიციის სამინისტროს გენერალური ინსპექციის ყოფილი მოადგილე, 2013 წლის 13 აგვისტოს, ათენში დააკავეს. ამჟამად კი ის საავადმყოფოში იმყოფება, ვინაიდან ათენის საპატიმროში სასტიკად გაუსწორდნენ. ჩხიტუნიძეს თავის არეში ბლაგვი საგნით მიყენებული აქვს მძიმე ტრამვა და საავადმყოფოში უგონო მდგომარეობაში იმყოფება.
