საქართველოს პენიტენციურ სისტემაში შიმშილობის მართვის მიმართულებით თანამშრომლების გადამზადება დაიწყო.
სასჯელაღსრულების სამინისტროს ინფორმაციით, 23-24 აგვისტოს სასჯელაღსრულებისა და პრობაციის სასწავლო ცენტრში, შესაბამის ტრენინგს სისტემის თანამშრომლების ორი ჯგუფი გაივლის.
სამინისტროს ინფორმაციით, მსჯავრდებულთა მხრიდან, სხვადასხვა მოთხოვნითა და მიზეზით, შიმშილობის აქციის გამოცხადება პროტესტის გავრცელებულ ფორმას წარმოადგენს. მსგავს სიტუაციაში სწორი და ადეკვატური რეაგირებისთვის, საჭიროა სასჯელაღსრულების სისტემის პერსონალის მიერ შესაბამისი ცოდნისა და უნარ-ჩვევების შეძენა.
ორთდღიანი ტრენინგი, სახელწოდებით "შიმშილობის მართვა სასჯელაღსრულების დაწესებულებებში" სისტემის ყველა იმ თანამშრომელს უტარდება, ვინც ყოველდღიურად ხვდება მოშიმშილე მსჯავრდებულებს. მათ შორისაა სასჯელაღსრულების დაწესებულებების სამედიცინო პერსონალიც.
სასჯელაღსრულების სისტემის პერსონალის საერთაშორისო და ეროვნული სტანდარტების მიხედვით გადამზადების მიზნით, სასჯელაღსრულებისა და პრობაციის სასწავლო ცენტრმა სასჯელაღსრულების, პრობაციისა და იურიდული დახმარების საკითხთა სამინიტროსა და სასჯელაღსრულების დეპარტამენტთან ერთად სასწავლო პროგრამა შეიმუშავა, რომელიც მოშიმშილე პატიმართა მარეგულირებელ ადგილობრივ და სერთაშორისო სტანდარტებსა და ევროსასამართლოს პრაქტიკას ეფუძნება.
ტრენინგის მონაწილეები განიხილავენ მოშიმშილე პატიმრებთან დაკავშირებულ პრობლემებსა და მათი გადაჭრის გზებს, სამედიცინო პერსონალისა და ციხის ადმინისტრაციის ფუნქციებს შიმშილობის პროცესის მართვის დროს.
ტრენინგის გახსნას სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი დაესწრო. მინისტრმა სასწავლო ცენტრის ინიციატივა დადებითად შეაფასა.
