აჭარის მთავრობის მრჩეველი, აჭარის ყოფილი მუფთი ბექირ ბოლქვაძე ადიგენის რაიონის სოფელ ჭელაში მინარეთის დემონტაჟს ვანდალიზს უწოდებს.
როგორც ბექირ ბოლქვაძემ აღნიშნა, მთავრობის თავმჯდომარე არჩილ ხაბაძემ მწუხარება გამოთქვა მომხდარის გამო. ბექირ ბოლქვაძის თქმით, მინარეთს არ უნდა შეხებოდნენ, რადგან ის ოფიციალურად სამლოცველოდაა გამოცხადებული.
"არჩილ ხაბაძესთან მუფთთან ერთად ვიყავი. მან მწუხარება გამოთქვა. მაქსიმალურად ეცდება დაბალანსდეს სიტუაცია. ჩვენც ვეცდებით უთანხმოება არ მოხდეს სარწმუნოებებს შორის. ყველა მხარე უნდა ეცადოს საკითხის მოგვარებას. მინარეთის გადმოგდება ვანდალიზმია. დიდი სოლიდარობა გამოვუცხადეთ ფერიის მთაზე მშენებარე ეკლესიის დანგრევის ფაქტს. ამ შემთხევაშიც, არ უნდა შეხებოდნენ მინარეთს, ის ოფიციალურად სამლოცველოდ იყო გამოცხადებული. ვინც შეეხო მინარეთს და ვისი დავალებითაც ეს გაკეთდა, ქართველი მუსლიმებიდან დიდი საყვედური. ალბათ, ღმერთიც დასჯის მათ", - აღნიშნა ბექირ ბოლქვაძემ.
ადიგენის რაიონის სოფელ ჭელის მეჩეთის მინარეთის დემონტაჟი გუშინ განხორციელდა. დემონტაჟის დროს მოსახლეობასა და სამართალდამცველებს შორის შეხლა-შემოხლის დროს 20-ზე მეტი ადამიანი დააკავეს.
